وقف الشريط في وضع ثابت

وقف الشريط في وضع ثابت

دلوقتي نقدر نفحص المنظر

مافيش ولا تفصيلة غابت

وكل شئ بيقول وبيعبر

من غير كلام

ولا صوت

اول ما ضغط الموت

على زر في الملكوت

بخفة وبجبروت

في يوم اخبر

وقف الشريط في وضع ثابت

دلوقتي نقدر نفحص الصورة

انظر تلاقي الراية منصورة

متمزعة

لكن مازالت فوق

بتصارع الريح اللي مسعورة

انظر تلاقي البلاد

اجيال ورا اجيال

رفعاها باستبسال

ونزيف دما سيال

ع الجبهة

وف عنفوان النضال

وقف الشريط في وضع ثابت

خلي المكنجي يرجع المشهد

عايز اشوف نفسي زمان وانا شاب

داخل في رهط الثورة وانا غضبان

ومش عاجبنى جنى أو انسان

قال المكنجى رجوع مفيش

عيش طول مافيك انفاس تعيش

بص شوف

ركن الشباب فيه ألف مليون شاب

ومش عاجبهم لا وصى ولا اب

أنظر اليهم وانت تتذكر

ليه ضربه صابت؟

وضربه خابت؟

وضربه وقفت بالشريط فى وضع ثابت؟

أنظر وشوف على المهل بالراحه

الشمس وسط القبه قداحه

والقدس واقعه

والهرم منداس

صوت الجرس والادان على قلبها حراس

وآدى بطلها هل فى الساحه

قلب الحجر فى الايد بيغلى حماس

قال المكنجى بلوم وانا مكلوم

قال المكنجى والشريط شغال:

مالكش تسأل سؤال

أنظر وشوف الحق لما يهل

أنظر وشوف الآن

بكره بقى إمبارح فى حضن زمان

وبعد بكره فوق همومك فات

مفيش شريط مأجور ولا خوان

ولا فيش شريط له زمان

قصيدة لصلاح جاهين بصوت سعاد حسني

القصيدة عندي ملف اوديو واول لما اكتشف ليه الملفت مابتترفعش عندي وحل اللغز دة هارفع القصيدة باذن الله

شكر خاص لمدونة انا حـــرة لانها اللي فكرتني بالقصيدة