خاص وحصري جدا

اعرف ناس كتير عملوا قبل كدة قصص مشتركة ونفذوا مع بعض اعمال ادبية مشتركة

لكني شخصيا ماعرفتش اي اتنين اشتركوا في قصيدة شعرية قبل كدة

يمكن لان للشعر طبيعة خاصة ويمكن لجلهي باللي الناس بتعمله

عامة قررت انا و دكتور شادي دكتور كوكب الارض اننا نتجنن في دماغنا ونكتب قصيدة شعر مشتركة
ولاننا اتجننا وعملناها كانت القصيدة


مجنوون..بضم النون ومد الواو على الاخر
ومش مجنون لخنقة نفس
ولا مكسور خلال اسبوع فقلت اتجنن امبارح
جنوني دة داء ومش باليد
جنوني مش حساب ولا عد
جنوني فيه انا مرتاح برغم الغربة في عنيهم
وعيني شايفة في عقولهم
جنان مخبول
ماهوش مسؤل عن الدنيا اللي حواليهم
ماليش فيهم
يقولوا غريب
يقوولوا مسكين
امد بكتفي ميت حيطة
واقف شملول
مابين الحيطة والحيطة
ومن غير ابوابها
ولا الشبابيك
بشوف في عنيهم امل محصور
يكونوا في يوم ولو ربعي
كما المجانين

بطاقتي زيها زيك
انا طالب
انا انسان
انا في الاسم والعنوان
انا في الضحكة والمغنا
حتي لو ملوش معني
حتي لو غريب عنهم حتي لو في عز الضحكة بجرحهم
انا في الفرحة دي اناني
و ميهمش كلام تاني

ياباشا بس رايح فين؟
دي حيطة ازاز
وانا اللي بنيت بلاد وبلاد
طب امشي وبص في الباقي يمين وشمال
صحيح احنا في فاترينا
لكني وقفت بمزاجي

وف الاخر تقول مجنون
وغيرك انت قال مجنون
وانا مجنون
وغيري كتير
وغنوا كتير
ورقصوا الشعر
ميتين مرة بدل مليون
اه..مش مجانين؟
ومش فارقة كلام تاني

قصيدة لـ

د/شادي عبد العزيز
م/ياسر خاطر