ضحك حزين

الفكرة مش انك تكون حزين جدا سعيد
بالعكس ان ا شايف ان دة الطبيعي كل واحد فينا له في حياته حاجات تفرحه وحاجات تحزنه
لكن الفكرة في انك تكون بتضحك وانك تكون قدام الناس كلها طبيعي وبتضحك يمكن اكتر منهم لكنك بتكون زي الحفرة العميقة النور مابيعرفش يوصل لاخرها ولو ضحكت قدامها صدى الصوت اللي بيطلع منها بيبقى اعلى من صوتك ميت مرة
الفكرة في انك لما تسمع اغنية معاكي بتاعة محمد منير الجديدة تقفلها بسرعة لانها كئيبة
اه اللي بيقول فيها معاكي بضحك بصوت عالي
غمض ودنك عن الكلام وشوف صوت منير عامل ازاي
اقفل صوت اي بني ادم ادامك وشوف اللي بيطلع الصوت دة ايه
الحزن اللي بيطلع على شكل ضحك بيكون مؤلم مليون مرة اكتر من اي حزن تاني
لو حزنت وبينت حزنك .. شوية وهايروح
لو حزنت و ضحكت ..حزنك هايتدفن جواك مش هايبان الا من عينيك... ومش هايروح
في ناس محرومة في حياتها من الدموع
دول اكتر ناس بتتألم في حياتها
لأن
الدموع سحابة تغسل الهواء كي يستعد لاستقبال الشمس
وان لم تهبط ستبقى رؤية الشمس مشوشة