حاليا في اكلية احنا بقالنا 3 اسابيع مخلصين امتحانات اخر السنة بتاعة اخر سنة-يارب ان شاء لله- واتقدمت بسبب مشع التخرج بيبقى في القسم بتاعنا-اللي هو عمارة- فردي واصعب من اي قسم تاني
فبعد المتحانات ادونا اسبوع اجازة وبقالنا اسبوعين شغالين في مشروع التخرج وبالمناسبة هو مطار....اي نعم كل واحد فينا هايعمل مطار كامل من بابه...الفكرة بقى ان الواحد ساعات دماغه بتروح شوية لما بعد المشروع ايه اللي ممكن يحصل فبتلف الدماغ وبتحط كل الاحتمالات الممكنة عادي يعني بس لما تيجي تقارن الحتمالات دي بالاربع سنين اللي قبل كدة تحط نقطة ومن اول السطر
اربع سنين عايش تماما مع 13 بني ادم بقعد معاهم اكتر ما بقعد مع اهلي ودة لان الشغل عندنا ساعات بيوصل للبيات ايام واسابيع في الكلية ....السنة اللي فاتت اهلى طول السنة كانو مسافرين برة مصر وانا كنت لوحدي هنا مربوط في الكلية فكان الناس معايا في الكلية وفي البيت لانهم مارضيوش يسيوني لوحدي
صحيح ممكن اكون بعيد شوية بسبب طبيعتي الانطوائية ومايعرفوش عني كتير بس برضو هم اكتر ناس تعرف عني اي حاجة ...كنت سمعت مرة والدتي بتتكلم مع حد عليا وبتقول انها ماتعرفش عني حاجة... مش تقصيرا منها ولا حاجة لكن دة مني انا
في ايام الاجازات والايام اللي مابنشوفش فيها بعض بيبقى عادي مش فارقة ..ماهم متلقحين في الكلية طول الوقت...ماهو كدة كدة هاشوفهم...لو روحت اي حتة هلاقيهم في وشي....كدة يعني بيبقى التفكير اللي في دماغ اي حد فينا
لكن ماقدرتش فعلا اتخيل اننا خلاص مش هانشوف بعض لفترات طويلة جدا وممكن ناس مانشوفهمش خالص بعد كدة....حقيقة التخيل دة مش عارف اركبه في دماغي....زي بالظبط لو اي حد بيحاول يتخيل انه اعمى او رجله اتقطعت صعب جدا
ساعات بحس في وشوشنا اننا مش عاوزين نوعى بالموضوع دة واللي حاسس بيه مش عاوز يعترف بيه لنفسه وبيهرب من ان الواقع دة بقى قريب جدا ....يمكن اكبر حاجة عملت لنا هزة كبيرة هي لما خلصنا الامتحانات بدأنا نتكلم ونفكر في اللي ممكن يحصل بس اقصى حاجة قدرنا نوصلها اننا نحدد يوم في الاسبوع نتقابل فيه وسكتنا عن الموضوع على طول ..وسكتنا لاننا خفنا
يمكن ناس كتير مش هاتقدر تحس باللي بتكلم فيه عشان احنا عددنا صغير ... عشنا على طول مع بعض ....عشان دماغنا واحدة.... قريبين من بعض.... صحيح بنعذب بعض وبنطلع عين اللي جابو بعض لكن احنا اقرب ناس لبعض... لاي سبب ممكن لكن الفكرة ذات نفسها ممكن تحصل لاي انسان بطريقة مختلفة
كان مؤمن-اكيد مؤمن واحد مننا- مرة قال : انا اول مادخلت القسم ماحبيتهوش وكنت عاوز احول مدني او اكمل في معهد السينما بس نفضت لمعهد السينما لما حسيت ان الدفعة دي مليانة رجالة واني مش هلاقي الرجالة دي في حتة تانية
انا فعلا مش متأكد انا عاوز اوصل لايه من كلامي في الموضوع دة لكن اللي متأكد مليون في الميه منه ان الـ 14 انسان اصحابي مش ممكن ابدا اقدر اعوضهم
No comments:
Post a Comment