استئناف

الفترة دي من الحياة من اغرب الفترات
حيث ان في كل حاجة بتطلع حاجات كتير واللي بيفكرني مش عارف ليه باحمد حلمي في مسرحية حكيم عيون مشهد المحكمة لما كان بيقول والخزنة تصرخ والارقام بتجري في كل حتة
يمكن عشان الارقام بتجري مني في كل حتة
طبعا اكتر حاجة تعقد اي واحد في موقفي هي الدراسة التوحشية -حلوة توحشية دي- نقول كدة اللي حصل الفترة اللي فاتت بالصلاتو ع النبي
قبل عيد الاضحى كان عندي تسليم مشروع التصميمات التنفيذية واللي بيسأل عن ايه هي ان شاء الله بتحط كل المقاسات وكل التفاصيل وكل حاجة في كل حاجة في المبنى عشان المقاول مايستعبطش ويسرق في المقاسات
دة كان يوم الحد اللي قبل عيد الاضحي طبعا الدكتور ماعجبوش مشروعي وانا شخصيا ماكانش عاجبني وماتكلمتش في المناقشة من اساسه يعني فالدكتور ربنا يخليهولي يارب خلاني اعيد المشروع واسلمه الحد اللي بعد العيد اي خامس يوم العيد ومش عاوز اقول ان اليوم اللي قبله كان تسليم ابتدائي للبحث النهائي بتاع مشروع التخرج في السريع كدة يوم الاتنين الاجازة بتاعتنا الحمد لله واقدر اقول وانا ضميري خلصان ع الاخر ان هي اجازة على الورق بس وكل بني ادم دخل عمارة عارف كدة كويس فعادي يعني
المفروض بقى يبقى عيد الاضحي واكل وفتة و وخرفان وكل ماااااااء وانتو طيبين لكن لا ازاي ياخويا ابدا
زي ما عرفنا ان يوم الحد خامس يوم العيد اسلم مشروع التصميمات التنفيذية ويوم الاتنين اجازة بس كدة وكدة يوم التلات بقى المفروض نسلم بحث اضاءة المطارات ودي طبعا مادة اول مرة بتخترع في التاريخ وبيتم التجربة في حضراتنا واللي سمعته يعني من بعيد لبعيد ان المفروض الناس بتاخد اضاءة عادي وبعد كدة بتتخصص مطارات او اي حاجة بس طبعا عشان احنا هندسة عمارة مطارات واول دفعة في المجال دة على الكرة الارضية فلازم يتم التجربة علينا كفئران التجارب او جزر التجارب لان فران التجارب صعب التحكم فيها عننا
المهم بس عشان مانخرجش عن الموضوع يوم التلات ماسلمناش حاجة وحاولنا اليوم اللي قبلها نكلم دكتور المادة عشان نأجل التسليم وماردش علينا وماجاش يوم التسليم فحصلت مشكة مع المعيدة بس الحمد لله حليناها وظبطنا واجلنا التسليم ليوم السبت بس احنا كنا بنأجل ليه عشان كان عندنا بالصلاتو ع النبي كدة يوم الاربع تسليم مشروعين لاندسكيب وتخطيط في ان واحد واللي المفروض ان في العادي ان دي تكون مادتين منفصلتين لكن طبعا عندنا هي مادة واحدة مدموجة متصلة غير منفصلة الوجدان
يوم الخميس بقى كان تسليم مشروع التصميم وعاوز اقتبس كلمة دكتور التصميم اللي لسة بترن في وداني لحد دلوقتي ( مش هارحمكم..مش هارحم حد ..يعني مش هاشعر بالرأفة تجاه حد فيكو) طبعا وقتها انا كنت بتشقلب وبمشي على الحيطة وانا والحياة بنلعب صلح
وعلى رأي سرحان عبد البصير :(ياسلاااام ..بقى هي كانت بتحب مطوة فراح ضاربها بواحد تاني) دة كان نفس الاحساس بالظبط وقتها
دة كان الموجز
اللي حصل بقى كان كالاتي
يوم الحد اللي قبل العيد اللي انا مش فاكر كان موافق ايه: سلمت مشروع التصميمات التنفيذية وتم طلب تأجيله مني
انا كنت ناوي اخد يوم الوقفة بليل اجازة واول يوم عيد اسلم على الناس قرايبنا وادبح الخروف وارجع بليل ارسم واكمل العيد رسم
اول يوم العيد:صليت العيد وانا بدبح الخروف خالي حصلت له حادثة على المحور روحت لامم بواقي الخروف وهي بيمأمأ بين دراعاتي في العربية وطلعت على القصر العيني الفرنساوي عيدت هناك ورجعت بليل خالص نمت
باقي ايام العيد: مش ماخرجتش من بيتنا لا ماخرجتش من اوضتي اصلا
يوم الاحد خامس يوم العيد: سلمت مشروع التصميمات التنفيذية لتاني مرة على التوالي وماكانش حلو برضيك
يوم الاتنين:كنت في الكلية عشان بنرسم التصميم
يوم التلات:ماسلمناش بحث الاضاءة وحصلت مشكلة واتحلت الحمد لله واجلنا التسليم يوم السبت
وحصلت المعجزة وحاولنا ع دكتور التصميم ونجحت المحاولة وأجلنا التسليم ليوم التلات وقامت الافراح واليالي الملاح وصلينا 250 ركعة شكر لله ومصر اليوم في عيد
يوم الاربع : سلمنا مشروعين اللاندسكيب والتخطيط وروحت لاول مرة من يوم الحد ونمت اه فعلا نمت بجد
من يوم الاربع بليل بعد مانمت وجيت الكلية تاني كان كل علاقتي بالحياة الخارجية اني بروح بيتنا الساعة 3 الصبح انام لحد الساعة8 او 10 بالكتير وارجع الكلية تاني
يوم اليوم الاحد بليل : وصلني خبر ان والد دكتور عندنا توفي والعزاء يوم الثلاثاء
يوم الثلاثاء الساعة 6 الصبح: اتنرفزت على المشروع ورميته وقلت مش هاسلم
ودة لان محسوبكو لسة خارج من حالة نفسية شديدة السواد واليأس والاحباط والبتنجان المغلي وكانت ضايعة عليا حاجات كتير فكنت متاخر في معظم المواد
يوم الثلاثاء الساعة 10: قلت للمعيدة بتاعة المادة انا مش هاسلم لان المشروع كان ناقص حاجات كتير والدكتور مش بيرحم بس هي اقنعتني اني اسلم وخلاص وبالفعل سلمت
يوم الثلاثاء الساعة 2 الضهر: اكتشفت ان الدكتور نجحني في الامتحان وحصلت المعجزة الثانية وكنت اتراقص من الافراح
واسمع الحمد لله
الحمد لله
بليل قبل ما انام كنت بهلوث لدرجة اني مش فاهم ايه اللي بيحصل حواليا ومش مستوعب اي حاجة في اي حاجة اكيد مش اللي بيحصل دة هو السبب لكن عدم النوم اللي تسبب بكدة فالواحد لما ماينامش لمدة اسبوع الا 3 ساعات متقطعة وبعد كدة 3 ايام بلا نوم نهائيا اكيد لازم الواحد يهلوث زائد الكلام الكتييير اللي فوق دة غير التفاصيل اللي كانت بتحصل في النص المهم ماقدرتش استوعب وقتها غير ان السرير للنوم لان الحيطة كانت راحت الهند والحلزون بيقول حيييح وابو الحسن زعبولا من الخربوطية

6 comments:

shaimaa said...

معلش هانت
الشده للجدعان
وبلاش تتعصب علي المشروع وتقول موش هسلمه
مفيش هزار في الحاجات دي
كله هيعدي لا تقلق يا هندزه

أوداد said...

ياسر

عيوني كانت هتدمع عليك يا صحبي

ولا يهمك يا صحبي ..بإذن الله بيتي اللي سيكون شبه تاج محل من بعيد بس..أنت اللي هتصممه

قول يا رب

سوسكــا said...

يااااااااااااااااااه
الكلام ده بالظبط حاصل معايا من العيد لغاية دلوقتي لغاية امبارح للدقة باختلاف اني في اسكندرية وفي تالتة يعني مفيش مشروع تخرج

انا كنت واصلة لمرحلة اني كل ساعة باشرب مج نسكافيه

وبقالي كام يوم كده عاملة ورشة عمل في بيت صحبتي انا و6 بنات تانيين
علي امل ان حاجة تخلص

علي ذكر مش حاسلمه .. انا امبارح سلمت مشروع الديزين .. كنت باطبع والباشمهندس بيقول فوق في القسم نص ساعة ومش حيستلم من حد ونظرا ان الكمبيوتر عملها معايا والمشروع رايي انه زي الزفت والطين تخيل رأي الدكتور بقي

كنت خلاص حالغي الطباعة واروح البيت انعي الديزين اللي حيتشال والوقت اللي ضاع والماكس وعمايل الماكس
لكن صحابي اقنعوني اسلم من باب اني ابقي سلمتت

اه كنت عايزة اسأل بقي اضاءة مطارات
ده قسم بحاله عندكم يعني ولا مادة اختيارية بس بتخدوها

Yasser said...

shaimaa

منا عارف ان مافيش هزار في الحاجات دي بس بيجي على الواحد وقت في الاخر بيجيب اخره والمشكلة ان قلة النوم عامل مساعد وحفاز ورائع في مثل هذه الاوقات
بس الحمد لله ربنا بيسترها
وفي الاخر المشروع اتسلم وبقينا ميت فل وعشرة
وكله عدى مش ناقص غير الامتحانات وعليكم كل خير
وبعدين يا هندزة احنا مانقدرش نتراجع في مثل هذه الاشياء طول مانتم في صفنا

Yasser said...

أوداد

اخويا و حبيب قلبي
امسك دموعك يابوغرارة ياخوي
السجن للجدعان او عمارة للجدعان مافيش فرق كبير بينهم يعني
كلها كام شهر واخر كفارةة باذن الله بس انت ادعيلي بس

وتاج محل ايه دة انت بيتك هايكون تحفة من تحف الزمان عجائب الدنيا السبع مش هاتيجي جنبه زرة رمل انا هاعمل لك في بيتك اللي ماتعملش في الاهرامات يا راجل ابسط حاجة هافتح لك بوابة على العوالم الموازية وشباك بيطل على الاقمار الطايرة واللي جنبه بيطل على بلوتو عدل
اوعى يعني هايكون قنبلة الموسم
بس انت بس ادعي اخرج كفارة قريب ان شاء الله

Yasser said...

سوسكا

اهلا بيكي ونرحب دوما بجميع الزملاء المعتقلين في جميع المعتقلات الخاصةفي كل بقاع مصر
نحن السابقون وانتم اللاحقون

النسكافيه دة يابنتي انابطلت اشربه من زمان دلوقتي في حاجات اقوي واكثر فعالية لان الواحد بعد ما ادمن النسكافيه بقى زي الميا مابيعملش اي حاجة في اي حاجة ووصفتي الخاصة السحرية هي كوباية نسكافيه وجنبها كوبايةبيبسي وبق من هنا وبق من هنا لان السخن مع الساقع مع السكر مع الملح بيعملو حاجات غريبة في الدماغ تحسي انك عاوزة تحلي بعديهم بكوباية حبر اخضر

ونفس اللي حصل معايا في التسليم اربع شاسيهات زي الفل عليهم شوية شخبطة رصاص ونقطتين حبر مع العلم اني بحب الماكس جدا بس قال ايه كنت خايف من عمايل الكومبيوتر والي بيعمله في الناس وقلت يا واد ياياسر اديها شوية حبر على طرطشتين الوان على كوبايتين يوكن المشروع هايزهزه واهو اللي حصل حصل فان شاء الله نويت والنية لله اديها كامبايوتر في التيرم التاني

موضوع اضاءة المطارات دة حكاية بقى لوحده
انا دخلت اول السنة لقيت كاتبين في الجدول مادة اختيارية ادخل الاوضة بتاعتنا الاقي الناس بتقول لي علينا اضاءة مطارات انا مش عارف هما عرفو منين الصراحة وماتقوليليش كنت اختار مادة غيرها لان احنا دفعتنا كلها 14 باسمهندش اد الدنيا فرئيس القسم هو اللي بيختار لنا المواد الاختياري وبالمناسبة هو نفس دكتور الديزاين ودكتور مشروع التخرج
بس الفكرة بقى ان احنا اول دفعة في عمارة عندنا
وعندنا دة يبقى هندسة وتكنولوجيا الطيران سابقا و اكاديمية مصر للطيران حاليا والمفروض ان احنا مهندسين معماريين متخصصين بالمطارات
واعتقد والله اعلم ان احنا اول ناس ندرس الصلة الرهيبة بين العمارة والطيران كدراسة اساسية في اكون ذات نفسه
فاللي بيحصل ان في مواد اول مرة اي حد يسمع عنها احنا بناخدها
ومنها
اضاءة المطارات
لان انا اسمع سمع خير يعني ان الناس بتدرس اضاءة في الكلية
وبعد كدة لما بتتخرج تعمل ماجستير مثلا عن اضاءة الطيران مثلا يعني وتتخصص فيها
فبصراحة ربنا يستر ياسوسكا يابنتي واعرف احل لغز حربية الازهر اللي انا قاعد فيها دي